رقيص العروس

**ود ام دقرسي** · 10-02-2009 02:37 PM

شباب سلام عليكم
الموضوع دا جا طاشي علي الليله الصباح شفتا لي فيديو فوقو عروس قاعده ترقص
الحاجه الانا عارفه انو العروس بترقص امام النسوان و بدقو ليها في الدلوكه كل مقطع صغير بترقص فيهو رقصه
يعني كدا وكدا دي رقصه و برضو كدا وكدا دي واحده تانيه
بسمع برضو فلانه رقصت علي 99 و فلانه علي 100 و هكذا دواليك
لكن الما فهمو وبدور اعرفوا العروس بتستفيد من الكلام دا شنو و الحاضرين ايضا .

**تالا** · 10-02-2009 04:32 PM

ود ام دقرسي

شكرا على الموضوع المفرح

ياسيدي يقال ان رقيص العروسة سابقا كان هو نوع من اشهار العروس امام الناس
واظهار مفاتن جسدها
واثبات انها فتاة عذراء وعدم تعرضها لاي خدوش او حتى كونها لا سمح الله تحمل سفاحا

وهذه العادة شأنها شأن كثير من العادات مرت بتطور كبير
فكانت العروس في السابق ترقص بما يعرف بالرحط
وهو عبارة عن مجموعة خيوط سميكة تربط حول الخصر وتتدلى للأسفل
وتكون عارية الا من مايسمى الرحط
وكان العريس يأخذ سبعة من هذه الخيوط السميكة ويقطعها
وذلك عادة ان العريس قوي
ومن هنا جاءت التسمية قطع الرحط

وبالتطور اصبحت العادة اكثر ايضا تطور
وهي عادة مميزة في السودان تتم يوم الصباحية

واصبحت الفتايات تتنافس في عدد الفساتين التي يتم بها الرقص
وعدد الرقصات ايضا

ومبروك وبيت مال وعيال

**ود ام دقرسي** · 10-02-2009 08:02 PM

تالا مشكوره على المرور الجميل
اذن هي عاده و حصل ليها تطور
لكن حته العروس دي ترقص و هي لابسه الخيوط دي بس انا مرتي ما بخليها ترقص لابسه الكلام دا لانو حتى لو رقصت قدام النسوان بس اسي بقت في موبايلات بتصور يعني ممكن تصور مره و البلوتوث دا ما خلا حاجه بكره الفيديو دا لو جابوه لي ما بنشلا عديل
اخيرا الله يبارك في الجميع

**ود ام دقرسي** · 15-10-2009 04:11 PM

معليش بس المشاره اتكررت مرتين

**ود ام دقرسي** · 15-10-2009 04:19 PM

اها يا اخوانا داير اعرف رايكم في رقيص العروس
خاصه مع الموبايلات و البلوتوث و اليوتيوب
و بتوافق انو مرتك ترقص قدام الناس
و العازفين كمان بكون رجال
حتى لو قلنا الحضور كلوا نسوان
و هل العاده دي ممكن نقول مقبوله
و لا عاده ما جميله
كدي ادوني رايكم
و بعدين ررقيص العروس اسي و زمان واحد و لا في حركات جديده (اخوكم لسه صغير)
تحياتي

**الحلفاوية** · 15-10-2009 05:25 PM

ودا ام دقرسي
والله موضوع يستاهل النقاش وانا راي

انو كلام فاضي وماليهو اي هدف في الحياة وكلو

عادات وتقاليد ماليها معنى في السودان والغريبه انو في ناس بفركشو العرس عشان

الرقيص وكلو كلام فارغ

تحياتي

**جراح** · 15-10-2009 05:40 PM

ود ام دقرسي سلام
وهكذا دواليك والا دلاليك
المهم نرجع للموضوع طبعا دي عادات وتقاليد متوارثه مازالت بعض الاسر ما شه بيها بس انا ما بحبذ رقيص العروس قدام رجال او نسوان بفضل يدوني الغنا دا في مسجل وترقصوا لي العروس ححصرياً شفت الرجفة دي كيف

**سواق ركشة** · 15-10-2009 10:28 PM

ودام دقرسي سلام عليك وعلى مواضيعك
اها رقيص العروس دا او قطع الرحط دا من
اجمل الحاجات في العرس السوداني لكن زمان
وقت النفوس كان طيبة والنية صافية يعني لا
كاميرا لا موبايل بس بترقص وصط النسوان
اما حسي فالبتأكيد حاجة غير مرغوب فيها
وتسلم تاني على الموضوع

**ود ام دقرسي** · 18-10-2009 03:25 PM

المشاركة الأصلية كتبت بواسطة سلومه

ودا ام دقرسي
والله موضوع يستاهل النقاش وانا راي

انو كلام فاضي وماليهو اي هدف في الحياة وكلو

عادات وتقاليد ماليها معنى في السودان والغريبه انو في ناس بفركشو العرس عشان

الرقيص وكلو كلام فارغ

تحياتي

سلومه سلامات
يعني من رايك انها عاده سيئه
الناس مفروض تتمسك بالعادات الكويسه
و العادات الكعبه تشلا و تديها البحر
العرس البفركش عشان رقيص العروس ده معناهو من اولو
مبني على اوهام
تحياتي

**ود ام دقرسي** · 18-10-2009 04:56 PM

المشاركة الأصلية كتبت بواسطة غزال الرياض

ود ام دقرسي سلام
وهكذا دواليك والا دلاليك
المهم نرجع للموضوع طبعا دي عادات وتقاليد متوارثه مازالت بعض الاسر ما شه بيها بس انا ما بحبذ رقيص العروس قدام رجال او نسوان بفضل يدوني الغنا دا في مسجل وترقصوا لي العروس ححصرياً شفت الرجفة دي كيف

غزال الرياض سلام
اوافقك الراي
لو هي يعني بتحب الرقيص شديد
ممكن يعني تدق ليها و تخليها ترقص
الصباح رقصه و اخر يوم رقصه
لمن الكرعين ديل يبقن رقاق و ابري عديل
كلامك صاح يا اخوي و انا معاك فيهو
تحياتي

**دكتورة ست الكل** · 18-10-2009 05:31 PM

أعتقد أنه تطور نحو الأسوأ ،،

و بهذا أصبح مثل بدع الجاهلية الأولى ،،

و صارت له طقوس ما أنزل الله بها من سلطان ،،

و حتى لو كان "حصريا على النساء" ،،

فأنا أرى أنه يحط من قدر المرأة ،،

و يجعلها كالقرد ،،

فرجة و ضحكة ،،

يعقبها ليل حالك السواد ،،

و دمت بود ود ام دقرسي .

**قمر الليالي** · 18-10-2009 05:53 PM

[ كلامك عين العقل ياود ام دقرسي بس ماتنسى ان كل ممنوع مرغوب بس والله موضوع خطير

**ود ام دقرسي** · 26-10-2009 04:06 PM

المشاركة الأصلية كتبت بواسطة سواق ركشة

ودام دقرسي سلام عليك وعلى مواضيعك
اها رقيص العروس دا او قطع الرحط دا من
اجمل الحاجات في العرس السوداني لكن زمان
وقت النفوس كان طيبة والنية صافية يعني لا
كاميرا لا موبايل بس بترقص وصط النسوان
اما حسي فالبتأكيد حاجة غير مرغوب فيها
وتسلم تاني على الموضوع

تعرف اسي الكلام ده بقى كتير لمن مسيخ
و التصوير ده ما خلا حاجه
حفلة الحنه العاديه دي البتكون كلها نسوان دي اخف من
رقيص العروس بي ملابس كده كيف كيف
اسي هي زاتا ما بتخجل من الرقيص قدام بتاع الساوند و الاورغن
غايتو يا اخوي الواحد معناها حفله ساي ما يسويها
تحياتي

**ود ام دقرسي** · 26-10-2009 04:09 PM

المشاركة الأصلية كتبت بواسطة دكتورة ست الكل

أعتقد أنه تطور نحو الأسوأ ،،

و بهذا أصبح مثل بدع الجاهلية الأولى ،،

و صارت له طقوس ما أنزل الله بها من سلطان ،،

و حتى لو كان "حصريا على النساء" ،،

فأنا أرى أنه يحط من قدر المرأة ،،

و يجعلها كالقرد ،،

فرجة و ضحكة ،،

يعقبها ليل حالك السواد ،،

و دمت بود ود ام دقرسي .

ست الكل سلامات
فعلا هي شبيهه بالقرود
ترقص و تفرق للناس و كلهم يعاينو ليها
و يعلقوا عليها
و بقت مظهر اجتماعي يعني
فلانه لبست ليها كذا توب و كده
يعني تبدا حياتا من البدايه بي غلط
تحياتي

**ود ام دقرسي** · 26-10-2009 04:13 PM

المشاركة الأصلية كتبت بواسطة قمر الليالي

[ كلامك عين العقل ياود ام دقرسي بس ماتنسى ان كل ممنوع مرغوب بس والله موضوع خطير

قمر الليالي سلامات
و وين انتي يا شيخه
فعلا الناس بقت تعمل اي حاجه مشاترا
تحياتي

دخول الاعضاء

أهلا وسهلا بك إلى منتديات سوداني.

الموضوع: رقيص العروس

أدوات الموضوع

عرض

تابعنى