أسطورة عزمي أحمد خليل - شاعر المشاعر -

[المحترف]

مقدمة عن الشاعر الاستاذ /عزمى أحمد خليل


من مواطنى وادى حلفا – دغيم - ولكن ولد وترعرع فى بورتسودان

درس مراحل الدراسية الابتدائي والاوسطى بين اروما وبورتسودان والمرحلة الثاتوية العليا في حلفا الجديدة ودرس فلسفة ومنطق وعلم نفس بجامعة القاهرة فرع الخرطوم واثناء دراسته الجامعية عمل بسودانير .

• عمل معلماً بمديرية كسلا.

• عمل ضابطاً بالخطوط الجوية السودانية بمطار الخرطوم

• عمل صحفياً بجريدتي الخليج والوحدة بدولة الامارات العربية المتحدة.

• عمل مشرفاً إجتماعيا بجامعة الملك سعود بالرياض

• سكرتير رابطة شعراء الغناء بالمهجر.

بعد تخرجه في عام 1980م ترك الوظيفة وهاجر الى الامارات وعمل بمهنة المتاعب في جريدة الوحدة في رأس الخيمة والعين وترأس مكتب جريدة الخليج في رأس الخيمة وذلك في الفترة بين عام 1980م والى عام 1982م ثم انتقل الى المملكة العربية السعودية حيث عمل مشرفا اجتماعيا بجامعة الملك سعود حتى عام 1986م وانتقل مرة اخرى للصحافة بالمنطقة الشرقية في السعودية حيث عمل بمجلة الشرق وجريدة الانباء الكويتية وجريدة الاقتصادية ومراسلا لجريدة الخرطوم ورئيس قسم التحقيقات في مجلة فواصل السعودية وذلك حتى العام 2000م وانتقل بعدها الى الولايات الامريكية المتحدة بمدينة واشنطن حيث عمل بالمعاهد الطبية الوطنية
National Institute Of Health (NIH)

بداياته الشعرية :
من اوائل الفنانين الذين التقى بهم في حياته بالمرحلة المتوسطة كان الفنان حمد الريح الذي شجعه لولوج مجال الشعر الغنائي واول فنان تغنى للشاعر عزمي احمد خليل كان الفنان عثمان مصطفى ـ بطاقة زفاف
وبعده العطبراوي ـ بلادي الحلوة
وتغنى له الفنان العاقب محمد الحسن ـ وديعة
ولحن له محمد الامين ـ درب النضال
وتحقق الحلم حينما تغنى له الفنان حمد الريح ـ في انتظار عينيك ( الحان عمر الشاعر ) ثم تردي وله ما تردي وكان هذا بمثابة حلم الصبا وانها كانت واحدة من امنياته ان يتغى له الفنان حمد الريح
وبعدها التقى بالفنان المهندس المرحوم / هاشم ميرغني وغنى له اغاني فيها من الالم والوله والحب وكل معاني الشجن حيث غنى له
1/ حان الزفاف وانا حالي كيفن شن بوصفو
2/ عشان اهلك بخليك
3/ افوت عينيك واقبل وين
4/ عندي كم في الدنيا زيك
5/ قدر فتشت
6/ مات الهنا قبال يتم سنة
7/ يعني ما مشتاقة لي
8/ هسه خايف من فراقك لما يحصل ببقى كيف
9/ ما خلاص نحن افترقنا
وغيرها من الاغاني
وبعدها التقى بالفنان المرحوم خوجلي عثمان والذى غنى له ـ يعني كيفن ما بريدك ـ وباقي ريدك في محلو
وغنى له الفنان ابوعبيدة حسن انتِ تبري من الالم ـ وحمدلله على السلامة
وتغنى له الفنان مجذوب اونسة ـ ده ما سلامك
والفنان محمد سلام ـ داير اقول ليك الا خايف
ونجم الدين الفاضل ـ انا اتأخرت سامحيني
ويوسف الموصلي ـ سفر العيون
والفنان محمود على الحاج ـ صحي مسافرة ـ وبريق المال
والفنان عبدالوهاب الصادق ـ زي حنانك
والفنان عبد العزيز المبارك ـ حلوة الصدفة
والفنان حمد الريح ـ الظروف يا حلوة دايما
والفنان سيف الجامعة ـ في بعادك ـ واجمل مني
والفنان الموسيقار الهادي ود الجبل ما اتعوده اخاف من قبلك الا معاك حسيت بالخوف
وتغنى له الفنان الهادي احمد عثمان ( عازف الفلوت المشهور ) عند الله ماهو بعيد .
والفنان محمود عبدالعزيز ـ طروني ليك
والفنان معتذ صباحي ـ احبك اكتر ـوجرح الفرقة
والتقى اخيرا وليس اخرا بالفنان حمد الريح قدري حبك وطيور المغربية
وله ديوان شعر تحت اسم (حان الزفاف) طبع ثلاثة مرات
وله مجموعتان شعريتان
الاولى مات الهنا تحوي القصائد التي غناها هاشم ميرعني وفي رثاء اصدقائه من ملحنين وفنانين وقد نشر منها مجموعة كبيرة في سودانيز اون لاين دوت كوم
والمجموعة الثانية اغنياتي في الغربة وهي الان تحت الطبع في مدينة ليز البريطانية وبشرف عليها الشاعر بشرى سليمان سعيد وقد كتب مقدماتها الراحلة ليلى المغربي والشاعر التجاني حاج موسى والشاعر عبدالوهاب هلاوي والشاعر حسن السر .

منقول - من كم منتدى كدا -

[المحترف]

بعض أشعاره العذبه ..........

حبة فرقه

أنا برجاك وعارفك جايه وما بتتأخري عني كتير
آسرك حبي وغالي عليكي وقلبي كمان في هواك أسير
ما العنقود لو جافي خمايلو نسمه تبكى ويشقى عبير
***
أنا ما ندمته على البيناتنا ولا جرحته مشاعرك يوم
وإنتِ هواي لو قايله ظلمتي ما تفتكري بعيش مظلوم
أن دنياي يا ستي محبه وعمرو الحزن على ما بيدوم
والدمعات لو مره بكيتها ما بتعيش في خاطري هموم
والأفراح ما بتجفى دياري مهما حبيابي يجيبوا اللوم
***
جابك درب الريده عشاني وبرضى لقيت في هواك دنيايا
وهسع فتى لناساً غيري وعايشه بقلبك لسه معايا
وقالوا بعد مرات بتغني وتبكي كمان يوم تطري غنايا
عارفك ما بتتهنى بدوني وأنا غيرك ما بلقى هنايا
ومهما تلاقي حنان عند غيري عمرك ما بتنسيهو هوايا
الأغصان بتعيش متشابكه ومره الغصن يجافي حبايبو
***
ولما الغيم ما يمر بي عندو يرجعوا ليهو وتاني يطايبو
وإنتِ بترجعي زي ما كنتِ وقلبك قلبي احن قرابيو
وما بتلقيني في اصلكِ وحبك إنتِ محال ما سايبو
اصلو البينا هي حبة فرقه وشاطيء هوانا بترسي مراكبو

و

قدري حبك

كتير حاولته انساكا لا نسيتك ولا قدرت

وقدر ما قلته ما بشتاق غلبني الشوق واشتقت

وبعد فكرته ما أرجع بكل مشاعري ليك عدت

***
زمن راجيك تحن مره وتشعر بي حناني عليك

وتدلل عليّ برضك تقلل في المحنه الفيك

وأزعل حبه يوم يومين ومن كترة شوقي أنسى وأجيك

انت صبحت ليّ قدري تقسى علي وأفتش ليك

وريدك بالعذاب الفيهو ما في أحنّ من عينيك

***

تمر أيام تكون وافي وترضى عليّ تفرحني

وأخاف أنا لو جرحتك يوم ودائما أنت جارحني

أجيك مشتاق ملان أفراح وللدمعات تروحني

وأعيشو وراكا ليلى حزين والآلأم تصابحني

وبرضى أعود أنا المظلوم وأقول ليك أنت سامحني

***
بقيت يا ريدي ليّ دنيا وزي دنياي عليّ قسيت

بحسك إنت أطيب زول وحتى جفاك كمان حبيت

وريدك ما في منو خلاص بطراك برضى مهما نسيت

وأنا نسيتك عشان أطراك ما انت معاي مشيت أو جيت

مقدر ليّ أعيش حبك رضيت بالفيهو ولا أبيت

ونواصل باااكر كان الله أراد

[المحترف]

وعــــد الحـــــر

لا لا ما بحزن عشانك لو صحى اتبدلته خنت
إلا لسع ما مصدق وانت في أعماقي إنت
*********************
قالوا عنك ناس قرايبك إنت عندك غيري غايه
وبرضو ليك ميعاد معاهم زي ميعادك داك معايا
الرسائل هي ذاتها وحرقة الشوق والوصايا
وبرضى صدق ما ظلمتك وقلته ما بتخون هوايا
وقلته مهما أغيب عليك إنت برضك في رجايا
******************
ما بصدق مهما قالوا ريدي في عينيك هان
اصلى عارفك ما بتلقى غيري سكه أمان
والحنان الشفتو مني زيو مين يديك حنان
وبرضى عازرك لو نسيتني وبي ورأي حبيت كمان
ما البيخون في يوم حبيبو بكره بيخونو الزمان
يلا قول وريني آخرك في قليبك غيري مين
والمحبه العشنا فيها ورحلة الشوق بالسنين
وكل حاجه جميله بينا روحت الليله وين
لا لا ما أظنك بتنسى وكنت طول عمرك حنين
إلا وين وعدك معايا ما قالوا وعد الحر هو دين


ده ما سلامك
عزمى احمد خليل
غناء :مجزوب اونسة

ده ما سلامك
ولا الكلام الكان زمان هسع كلامك
ولا يعنى نويت تسيبنا وفي الخريف تحرم غمامك
وده ما سلامك
**
جينا بعد الفرقه نسأل قلنا نلقى محنه عندك
نحكي ليك عن ليك شقانا وعن متاهات نجمو بعدك
نحن سالمناك بطيبه وياما بكى عيوننا ردك
وليه زمان اديتنا ريده وجيت حرمتنا تاني ودك
وقلبنا الجرحت خاطرو برضو ما قادر ملامك
وده ما سلامك
***
كنا قايلين بي ورأنا إنت زينا طاري ديمه
وكنا قايلين نحن عندك زي عيونك لينا قيمه
قلنا تتلقانا إنت والزهور تحضن نسيمه
إلا ريدك تاري روِّح وعدي فات زي كل غيمه
جينا ليك بالأبتسامه إلا ما لقينا ابتسامك
وده ما سلامك
***
جينا شايلين ليك فرحنا وكان عشمنا تزيدو حبه
تطرى ناس فاقدين عيونك وبي وراك ما خلوا غربه
قلنا ننسى تعب سفرنا بي ليالي معاك أحبه
جينا ما لقينا في عيونك ذكرى ساكت للمحبه
شلنا شوقنا رجعنا بيهو وما ندمنا على سلامك
وده ما سلامك

عزّ الممات

صحى يا حياة ؟ ضىء الشباب في عينيك مات

وكل الحكايا الحلوه ديك الليله صبحت ذكريات

***

يا قلبي أغرق في الأسى ويا عيوني شيلي الليل دموع

وأبكيها يا عمري الحزين ما مات خلاص ضىء الشموع

الآهه تحرق في الحشا والنار بتوقد في الضلوع

والحلوه عدت لي بلاد ما فيها أصلو درب رجوع

والناس بتسأل وين حياة؟

***

مليتي دنيا الناس خلاص وعدمتي حيله مع الزمن

شوفي الزمن غدار وكيف ما راضى غير عمرك تمن

كم من قليب حزنان وراك وكم من عيون بعدك بكن

وحياتنا بيك كانت فرح والليله دايبه عليك حزن

وواحشاها عينيك يا حياه

***

الليله بختك يا تراب جاتك حياة بي طيبتها

ما تقسى إنت عليها يوم بي طيبه اسمع قصتها

العزه في عالمنا داك كانت زمان من عزتها

ولا من لقت ظلم الزمان الدنيا فاتت خلتها

واهي ليكا جات

***
يا الله يا واهب العمر يا الديمه للطيبين وفي

أديها من عندك حنان وهو أحن منك إنت في

خليها تنسى الدنيا ديك ما البي جوارك مكتفى

والرحمه عندك إنت بس يا عالم السر الخفي

وفي ذكرتك عزّ الممات

***

دايرانا بعدك نحيا كيف ما كنت نورنا وضينا

والكان بيفرحوا بي لقاك الليله فاقدينك هنا

ولو جيتي لعيوني الحنان الليله مات فيهن سنا

والليله كل زول وألفك دنياهو صبحت محزنه

بيبكي وبيسأل وين حياة؟؟؟